जिल्हा मध्यवर्ती बँकेने बलुतेदारांना संयुक्त कर्ज वाटप करावे

पंढरपूर (प्रतिनिधी)

समाजातील कारागीर संस्था आणि बारा बलुतेदार यांच्या आर्थिक उन्नतीसाठी संयुक्त कर्ज देण्याची सोय आहे. प्रत्येक कारागिराला या प्रकारचे संयुक्त कर्ज
देता येते. ही संयुक्त कर्ज प्रकरणे जिल्हा मध्यवर्ती बँकेने सुरू करावीत , याकामी गटपातळी बहुउद्देशीय संस्था मध्यस्ताची भूमिका बजावेल, अशी मागणी
पंढरपूर गटपातळी बहुउद्देशीय संस्थेकडून जिल्हा मध्यवर्ती बँकेच्या प्रशासकांकडे करण्यात आली.

याबाबतचे निवेदन नुकतेच जिल्हा मध्यवर्ती बँकेचे प्रशासक कुंदन भोळे यांना देण्यात आले असून, याप्रसंगी पंढरपूर गटपातळी बहुउद्देशीय संस्थेचे चेअरमन सत्यवान देवकुळे, व्हा. चेअरमन राजेंद्र मस्के तसेच संचालक अशोक पाटोळे हेही उपस्थित होते. कारागीर संस्था आणि बारा बलुतेदारांच्या आर्थिक उन्नतीसाठी या संस्थेकडून करण्यात आलेली मागणी अगदी रास्त असल्याच्या प्रतिक्रिया, समाजातून उमटू लागल्या आहेत.

संयुक्त कर्ज प्रकरण म्हणजे कारागीर संस्था आणि कारागिरांना त्यांच्या व्यवसाय वृद्धीसाठी कर्ज देण्याची सोय आहे. हे कर्ज घेऊन बारा बलुतेदार आपला व्यवसाय भक्कमपणे चालवू शकतात. कारागिरांसाठी
एक लाख रुपयांपर्यंतची संयुक्त कर्ज प्रकरणे देण्यास जिल्हा मध्यवर्ती बँकेने सुरुवात करावी, याकामी पंढरपूर गटपातळी बहुउद्देशीय संस्था महत्वपूर्ण भूमिका बजावेल. या संस्थेच्या सुमारे ५० लाख रुपयांच्या ठेवी जिल्हा मध्यवर्ती बँकेत आहेत. जिल्हा मध्यवर्ती बँकेने अशी कर्ज प्रकरणे मंजूर केल्यास, कर्जाच्या वसुलीसाठी पंढरपूर गटपातळी बहुउद्देशीय संस्था निश्चितच मदत करेल, असा विश्वास या संस्थेकडून जिल्हा मध्यवर्ती बँकेच्या प्रशासकांना देण्यात आला आहे.