पंढरीत आज काँग्रेसची महत्त्वपूर्ण बैठक

पंढरपूर शहर व तालुका काँग्रेस कमिटीची महत्वाची बैठक शुक्रवार दि. ९ ऑगस्ट रोजी येथील सु.रा. परिचारक पतसंस्थेत होणार असून, या बैठकीतम हत्त्वाच्या विषयांवर चर्चा होणार आहे. या बैठकीस कॉंग्रेसच्या सर्व फ्रंटल सेलच्या आजी-माजी पदाधिकाऱ्यांनी उपस्थित राहावे, असे आवाहन काँग्रेस कमिटीचे तालुकाध्यक्ष हनुमंत मोरे यांनी केले आहे.

महाराष्ट्र प्रदेश काँग्रेस कमिटीचे अध्यक्ष नाना पटोले, काँग्रेस नेते माजी केंद्रीय मंत्री सुशीलकुमार शिंदे, खा. प्रणिती शिंदे,जिल्हाध्यक्ष डॉ. धवलसिंह मोहिते पाटील, जिल्हा कार्याध्यक्ष ॲड. नंदकुमार पवार यांच्या मार्गदर्शनाखाली, तसेच काँग्रेसचे ज्येष्ठ नेते प्रकाश पाटील यांच्या प्रमुख उपस्थितीत ही बैठक संपन्न होणार असल्याची माहिती त्यांच्याकडून देण्यात आली आहे.

पंढरपूर शहरातील टिळक स्मारक येथील सु.रा. परिचारक पतसंस्था येथे ही बैठक सायं. ४.३० वाजता होणार असून, या बैठकीत मतदार नाव नोंदणी आढावा, सरकार विरोधी मागील तीन महिन्यातील व पुढे होणारी आंदोलने, सोशल इंजिनिअरिंग, बुथ कमिट्या आणि बी.एल.ओ आढावा आदी विषयांवर चर्चा होणार आहे. तरी पंढरपूर शहर आणि तालुक्यातील काँग्रेसच्या सर्व फ्रंटल सेलच्या आजी माजी अध्यक्ष, पदाधिकारी आणि कार्यकर्त्यांनी या बैठकीस आवर्जून उपस्थित राहावे, अशी विनंती पंढरपूर तालुका काँग्रेस कमिटीचे अध्यक्ष हनुमंत मोरे यांच्याकडून करण्यात आली आहे.