पंढरपूर (प्रतिनिधी)
राज्य सरकारने अमलात आणलेल्या माझी लाडकी बहीण योजनेसाठी, ऑनलाईन अर्ज भरताना, महिलांना लुबाडणाऱ्या दोन नेट कॅफेविरोधात गुन्हे दाखल करण्यात आले आहेत. जिल्हाधिकारी कुमार आशीर्वाद यांच्या मार्गदर्शनाखाली सोलापूर उत्तरचे प्रांताधिकारी सदाशिव पडदूने आणि मंडळ अधिकाऱ्यांनी हे गुन्हे दाखल केले आहेत.
माझी लाडकी बहीण ही अत्यंत महत्त्वाकांक्षी योजना राज्यात सर्वत्र राबविली जात आहे. या योजनेअंतर्गत पात्र महिलांना प्रति महिना पंधराशे रुपये राज्य सरकार देणार आहे. प्रतिवर्षी ४६ हजार कोटी रुपयांची तरतूद राज्य शासनाच्या वतीने करण्यात आली आहे. या योजनेचे ऑनलाईन अर्ज भरत असताना, महा-ई-सेवा केंद्र अथवा नेट कॅफे यांनी, कोणतेही शुल्क न करता, मोफत अर्ज भरून महिला लाभार्थ्यांना सहकार्य करण्याबाबत शासन निर्णय निर्गमित केले आहेत. शासन संबंधित सेवा केंद्राला प्रति अर्ज ५० रुपये शुल्क देणार आहे.
असे असले तरीही सात रस्ता परिसरातील दोन नेट कॅफे चालकांनी, अशा लाभार्थी महिलांकडून शंभर रुपये व दोनशे रुपये शुल्क आकारल्याप्रकरणी त्यांच्या विरोधात सदर बजार पोलीस ठाण्यात गुन्हा दाखल करण्यात आला आहे. जिल्ह्यातील कोणत्याही महा-ई-सेवा केंद्रावर अथवा नेट कॅफेवर, या योजनेचे अर्ज भरताना संबंधित महिला लाभार्थ्याकडून कोणतेही शुल्क घेऊ नये, असे निर्देश जिल्हाधिकारी कुमार आशीर्वाद यांनी दिले आहेत.
सोलापूर मधील सात रस्ता परिसरातील प्रगती नेट कॅफे आणि योगेश्वर नेट कॅफे यांच्यावर हा गुन्हा दाखल करण्यात आला असून, त्यांनी प्रत्येक लाभार्थ्याकडून १०० ते ३०० रुपये घेतले असल्याची गुप्तवार्ता, सोलापूर उत्तरचे प्रांताधिकारी सदाशिव पडदूने यांना मिळाली. त्यांनी तहसीलदार आणि मंडळ अधिकाऱ्यांना घेऊन संबंधित नेट कॅफेवर जाऊन खात्री केली, आणि या दोन्ही सेंटरवर गुन्हे दाखल करण्याचे आदेश दिले. यानुसार मंडल अधिकारी सारिका वाव्हाळ यांनी सदर बाजार पोलिसांकडे फिर्याद दाखल केली आहे. याप्रकरणी नेट चालकांविरोधात भा.न्या.सं.३१८(२),३१८(४),३(५) प्रमाणे गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक शिंदे हे करीत आहेत.
